🌙 တစ်ညကို အိပ်ချိန် (၈) နာရီ ပြည့်ရမယ်ဆိုတဲ့ စည်းမျဉ်းက မှန်နေတုန်းပဲလား⁉️
မကြာသေးခင်က ပြုလုပ်ခဲ့တဲ့ လေ့လာမှုတွေအရ လူတိုင်းအတွက် (၈) နာရီ ပြည့်အောင် အိပ်သင့်တယ်ဆိုတဲ့ သတ်မှတ်ချက်ထက် အသက်အရွယ်၊ တစ်ဦးချင်းလိုအပ်ချက်၊ အိပ်ချိန်ပုံမှန်ဖြစ်မှုနဲ့ အိပ်စက်မှုအရည်အသွေးတွေကိုပါ ထည့်သွင်းစဉ်းစားဖို့လိုကြောင်း ပြန်လည်သတိပေးထားပါတယ်။
လူတိုင်း (၈) နာရီအိပ်ဖို့လိုအပ်လားဆိုရင် မလိုအပ်ပါဘူး။ တစ်ယောက်နဲ့တစ်ယောက် လိုအပ်တဲ့အိပ်ချိန် မတူနိုင်လို့ ဖြစ်ပါတယ်။
❌ အိပ်ချိန်နည်းလွန်းတာလည်း မကောင်းသလို များလွန်းနေရင်လည်း သတိထားရမယ်။ အိပ်ချိန်နည်းလွန်းတာရော၊ များလွန်းတာရောက ကျန်းမာရေး ထိခိုက်စေတာကို လေ့လာမှု အများစုမှာ တွေ့ရှိထားပါတယ်။
ခေတ်သစ်လူနေမှုပုံစံမှာ ဖုန်း၊ ကွန်ပျူတာ၊ မီးအလင်းရောင်တွေက ခန္ဓာကိုယ်ရဲ့ ဇီဝစည်းချက်ကို နောက်ကျသွားစေနိုင်ပါတယ်။ ရုံးဖွင့်ရက်တွေမှာ အိပ်ချိန်နည်းကာ ရုံးပိတ်ရက် ရောက်မှ အတိုးချအိပ်ကြတာမျိုးလည်း အဖြစ်များပါတယ်။ အိပ်ချိန်ကို ပုံမှန်ထားနိုင်ဖို့က အရေးကြီးပါတယ်။ ဒါပေမယ့် ရုံးတက်ရက်တွေမှာ အိပ်ရေးပျက်တာများခဲ့ရင် ပိတ်ရက်မှာ ပိုအိပ်ပေးလိုက်တာမျိုးက မအိပ်တာထက်စာရင်တော့ ပိုကောင်းပါတယ်။
ဒါဆို အိပ်ချိန်ဘယ်လောက် ရှိသင့်တာလဲ⁉️
၁။ အရွယ်ရောက်ပြီးသူအများစုအတွက် တစ်ည အိပ်ချိန် (၇) နာရီမှ (၉) နာရီက သင့်တော်ပါတယ်။
၂။ နေ့တိုင်း အိပ်ချိန်/နိုးချိန်ကို တတ်နိုင်သမျှ ပုံမှန်ထားသင့်ပါတယ်။
၃။ ညအိပ်ခါနီး အလင်းရောင်နဲ့ screen time ကို လျှော့ချသင့်ပါတယ်။
၄။ အိပ်ရာနိုးလာရင် လန်းဆန်းရဲ့လား၊ နေ့ခင်းမှာရော အိပ်ငိုက်နေတတ်လား သတိထားစောင့်ကြည့်သင့်ပါတယ်။ ဒီလိုတွေဖြစ်နေရင်တော့ အိပ်ချိန်မလုံလောက်တာ ဒါမှမဟုတ် အိပ်စက်မှုအရည်အသွေး မကောင်းတာ ဖြစ်နိုင်ပါတယ်။
၅။ အိပ်ချိန်ကောင်းကောင်းရနေပေမယ့် အမြဲပင်ပန်းနေရင်တော့ ကျွမ်းကျင်ပညာရှင်နဲ့ တိုင်ပင်စစ်ဆေးသင့်ပါတယ်။
🌝 တစ်ညတစ်လေ အိပ်မပျော်တာ၊ အိပ်ချိန်နည်းသွားတာမျိုးအတွက်ကိုတော့ အလွန်အမင်း စိတ်ပူမနေသင့်ဘဲ အရေးကြီးတာက အိပ်ရေးပျက်တာကို နေ့စဉ်အလေ့အထတစ်ခုလို ဖြစ်မသွားအောင် ပြန်လည်ထိန်းညှိဖို့ပဲ လိုအပ်ပါတယ်။